Kristrún Frostadóttir, formaður Samfylkingarinnar, virðist frekar vilja sjá umræðu um hvað sé sanngjarnt veiðigjald sem lagt er á sjávarútveginn í stað þess að ræða stórfelldar kerfisbreytingar sem skapa ófyrirsjáanleika, sem um sinn skaðar rekstrarumhverfi útgerðanna og þannig forsendur þeirra til að standa undir auknum veiðigjöldum.
Kom þetta fram í pallborðsumræðum á ársfundi Samtaka fyrirtækja í sjávarútvegi sem haldinn var í Hörpu á föstudag.
Í umfjöllun Morgunblaðsins um fundinn er bent á að Kristrún hafi í umræðunum tekið undir með Sigurði Inga Jóhannssyni fjármálaráðherra, sem einnig var í pallborði, að grundvöllur að áframhaldandi verðmætasköpun í sjávarútvegi væri að hafa ekki stöðugt hangandi yfir sér milli kjörtímabila og hverra kosninga í hvaða átt kerfið væri að fara. Fyrirsjáanleiki væri mikilvægur.
„En ég held að fólk verði að vera raunsætt um hvað þarf til að þjóðin sé sátt við að það sé ekki farið í stórkostlegar breytingar og hvað þurfi að koma á móti, því það fæst ekki eitthvað fyrir ekki neitt,“ sagði Kristrún.
Fjöldi gesta sóttu ársfund SFS á föstudag.
mbl.is/Kristinn Magnússon
Enginn að tala um 50 milljarða veiðigjöld
Hún sagði að Samfylkingin hefði nýlega lagt fram hugmyndir fyrir næstu tvö kjörtímabil þar sem fókus er lagður á veiðigjöld í sjávarútvegi. Hún sagði á fundinum að sér þætti dálítið naívt að segja að aðkoma hins opinbera hefði ekkert að gera með verðmætasköpun í greininni.
„Greininni var lokað og það myndast ákveðin renta í henni […] en það þarf að ná sátt um hvernig henni er skipt með sanngjörnum hætti. Ég vil sjá að við komumst á þann stað að við tölum um þessa ákveðnu þætti, að við séum stolt af kerfinu og greininni og tökumst þá á um upphæðir frekar en nákvæmlega stórkostlegt kerfisuppbrot sem skapar þessa hræðslu í kerfinu.“
Kristrún sagði að skapa þyrfti forsendu fyrir að hægt væri að taka fjármagn út úr greininni og sagði að svigrúm væri til staðar til að greiða út meiri veiðigjöld. „Það hefur verið rætt um að auðlindarentan sé 50-60 milljarðar en það er enginn að fara að tala um 50 milljarða auðlindagjald á næsta kjörtímabili. En það er verið að tala um að við getum komist á tíu ára tímabili nær tuttugu milljörðum.“
Til samanburðar greiddu sjávarútvegsfyrirtæki alls 10,2 milljarða í veiðigjöld árið 2023.