Eggert Skúlason
Fjöldi manndrápsmála á Íslandi síðustu tólf mánuði hefur vakið óhug. Átta slík mál hafa komið upp á síðustu tólf mánuðum hér á landi. Fimm mál voru rannsökuð í fyrra og þrjú mál eru til rannsóknar það sem af er ári.
„Við vorum með fimm manndráp í fyrra en við sáum líka fimm manndráp árið 2000, þannig að þetta er ekki tala sem við höfum aldrei áður séð,“ segir Guðbjörg S. Bergsdóttir verkefnastjóri hjá gagnavísinda- og upplýsingadeild við embætti ríkislögreglustjóra, sem vinnur við að skoða tölfræði og taka hana saman, þegar kemur að afbrotum á Íslandi.
Hún segir of snemmt að segja til um einhverja fjölgun manndrápa á Íslandi út frá þessum tölum. Hún vitnar til áranna 1999 - 2003 þegar hlutfall manndrápa miðað við íbúafjölda var sambærilegt miðað við það sem við nú sjáum.
Meirihluti gerenda í þeim málum sem nefnd eru hér að ofan eru Íslendingar. Karlmenn eru gerendur í 90% þeirra manndrápsmála sem upp hafa komið á öldinni. Ríflega helmingur málanna ber með sér að þau tengjast neyslu og að gerandi og þolandi hafi þekkst.
Manndrápstíðni á Íslandi er með því lægsta sem þekkist á Norðurlöndunum og er það hlutfall svipað og í Noregi. Finnland hefur skorið sig nokkuð úr og verið með hærra hlutfall slíkra mála að teknu tilliti til fjölda íbúa. Vart hefur orðið við fjölgun manndrápa bæði í Danmörku og í Svíþjóð, síðustu ár.
Í fyrra varð fjölgaði alvarlegum ofbeldisbrotum verulega á Íslandi en það ár sker sig úr í samanburði við fyrri ár. Guðbjörg segir að grannt sé fylgst með áframhaldandi þróun á þeim málaflokki.
Þátturinn í heild sinni er aðgengilegur áskrifendum Morgunblaðsins.