Í tilefni komandi forsetakosninga ákvað Smartland að skyggnast á bak við tjöldin og spyrja forsetaframbjóðendur spjörunum úr. Forvitnast um það sem fáir vita en allir ættu hins vegar að vita.
Fimm spurningar um forsetaframbjóðendur: Eiríkur Ingi Jóhannsson
Fyrsti kossinn?
„Stjúpfaðir minn var landgönguliði í bandaríska sjóhernum. Fyrsti kossinn átti sér því stað á herstöð á eyjunni O‘ahu á Havaí. Árið var 1985 og ég var níu ára gamall. Ég kyssti stúlku að nafni Beth.“
Hvaða plaköt prýddu veggi herbergis þíns á unglingsárunum?
„Þau voru nokkuð fjölbreytt, en meðal annars var ég með myndir af fyrrverandi körfuknattleiksmanninum Michael Jordan, liðsmönnum hljómsveitarinnar Run-D.M.C. og plaköt af landgönguliðum og traktorum.“
Fyrstu tónleikarnir?
„Fyrstu stórtónleikarnir áttu að vera með rokksveitinni Poison í Kaplakrika en sveitin hætti við á síðustu stundu þar sem bassaleikarinn puttabrotnaði. Ég man ekkert hverjir stigu á svið í staðinn. Mig rámar í að þetta hafi verið í kringum 1991 eða 1992.“
Uppáhalds árstíð?
„Sumarið á landi en ofan í hafdjúpinu á vorin.“
Botnaðu setninguna: Minn forseti er... :
„Sjáanlegur í spegli á hverjum degi.“