Seiglurnar eru komnar í höfn í Reykjavík eftir hringferð sína umhverfis Ísland á fimmtíu feta seglskútu. Hafnsögubáturinn Magni tók á móti skipinu og sprautaði vatni til að heiðra áhöfn skipsins sem var tilkomumikil sjón. 

Skútan Esja kom í höfn um klukkan hálf þrjú í dag eftir að hafa siglt síðasta legginn frá Vestmannaeyjum til Reykjavíkur. 

Framtakið hefur vakið nokkra athygli þar sem konurnar sem sigldu með skútunni hafa reglulega sagt frá ferðum sínum á Facebook-síðunni Kvennasigling. 

Þrjátíu og sex konur á öllum aldri tóku þátt í siglingunni en markmið verkefnisins var að virkja konur til siglinga, vekja athygli á heilbrigði hafsins og hvetja til ábyrgrar umgengni við hafið og auðlindir þess. 

„Vindur í segl er umhverfisvænsti orkugjafinn til að komast frá einum stað til annars. Það þarf kjark og úthald til að sigla við Ísland og við viljum hvetja konur til að takast á við hafið,“ segir á heimasíðu framtaksins. 

Ferðin tók um þrjár vikur og var komið við í sjö höfnum. Hægt að var að slást í för með Seiglunum staka leggi siglingarinnar en einnig var föst áhöfn um borð. 

Sigríður Ólafsdóttir var skipstjóri á Kríu. Sigríður er með alþjóðleg atvinnuréttindi fyrir skip allt að 45 metrum, vélarvarðarréttindi og með meistarapróf í umhverfis- og auðlindastjórnun þar sem hún hefur sérhæft sig í umhverfisfræðum hafs og strandsvæða.

Mun þetta vera í fyrsta sinn sem áhöfn eingöngu skipuð íslenskum konum siglir í kringum landið á skútu.

Sömuleiðis fóru bátar frá Rafnari bátasmiðju til móts við Esju til að taka á móti konunum.

Í fréttinni var fyrst sagt frá skútunni Kría, en skútan heitir Esja og hefur fréttin verið uppfærð með tilliti til þess.